Diario da Universidade de Vigo
O primeiro premio foi para a imaxe ‘Leyendo taludes de oro’ da enxeñeira María Rocha
A Escola de Enxeñaría de Minas e Enerxía entrega os premios do concurso fotográfico Enfoca.RME
Desde o centro destacaron a chegada de imaxes provenientes de diferentes partes do mundo
1º premio: 'Leyendo taludes de oro', de María Rocha
2º Premio, 'Verdi 02', de Cristina Aitana Verde Salas
Panel coas imaxes que participaron no concurso
Un intre da entrega de premios no vestíbulo do centro
A Escola de Enxeñaría de Minas e Enerxía entregou esta semana os premios do concurso fotográfico Enfoca.RME, unha iniciativa coa que o centro reta ás persoas afeccionadas ao mundo da fotografía a captar as mellores imaxes protagonizadas polos recursos mineiros e enerxéticos desde calquera punto de vista: xeración, transformación, transporte e uso de enerxía, enerxías renovables, explotación de minerais e rochas, obras subterráneas, restauración de espazos mineiros, etc.
Nesta ocasión o primeiro premio, dotado cun vale de 300 euros, foi para a fotografía Leyendo taludes de oro, realizada pola enxeñeira María Rocha, consultora de voaduras en Rocha Blast Engineers, e o segundo –valorado en 150 euros-, para Cristina Aitana Verde por Verdi 02.
A entrega de galardóns tivo lugar no vestíbulo central da escola e nela contouse coa participación do enlace de Igualdade do centro, Generosa Fernández, e do subdirector José Santiago Pozo, quen amosou a súa satisfacción pola chegada de arredor dunha ducia de imaxes “de elevada calidade” provenientes de todo o mundo, algo que tamén destacou o xurado, composto nesta ocasión polos docentes Mercedes Solla e Pablo Eguía, a PAS María del Carmen Romo, as alumnas Carmen Filgueira e Nuria Castro e o fotógrafo profesional Alejandro Lafuente.