Diario da Universidade de Vigo
Nunha xuntanza celebrada este luns nas instalacións universitarias
Membros da lista do BNG por Ourense reúnense con responsables académicos
Co obxectivo de dialogar sobre as necesidades do campus, dos seus centros e dos seus colectivos
Imaxe da xuntanza
A reunión estivo encabezada por Francisco Javier Rodríguez, vicerreitor do campus, e por Noa Presas, cabeza de lista do BNG por Ourense
Coa ollada posta nas eleccións autonómicas do vindeiro 18 de febreiro, este luns o campus de Ourense recibiu a visita da cabeza de lista do BNG por Ourense, Noa Presas, acompañada por membros desta lista e do seu partido, como Iago Tabarés e Luis Seara. Reuníronse co vicerreitor deste campus, Francisco Javier Rodríguez Rajo, e cunha representación dos decanatos e direccións dos diferentes centros universitarios. A xuntanza, que se celebrou na Vicerreitoría do campus, foi solicitada polo Bloque Nacionalista Galego co obxectivo de escoitar de primeira man as necesidades do campus, dos seus centros e colectivos e de dialogar sobre as propostas do BNG no ámbito universitario.