Unha semana para afondar nos múltiples ámbitos do deseño

Co obxectivo de achegar o alumnado á realidade profesional en diferentes sectores, o Campus Crea promoveu nas últimas semanas, coa colaboración da Deputación de Pontevedra e o Consello Social da Universidade de Vigo, as Conversas Empresa Universidade, un ciclo de encontros que se pecha nesta semana na Facultade de Deseño. Desta volta, faino combinando o achegamento aos seus diferentes ámbitos de traballo cunha vertente práctica, a través dunha serie de talleres que permiten ao alumnado da facultade iniciarse no deseño de embalaxe e editorial, así como na ilustración para moda.

Estas xornadas arrancaron este luns cunha conferencia na que Ricardo Tubío e Xabier Rilo, do estudio Cenlitrosmetrocadrado, presentaron algúns dos proxectos que realizaron ao longo de vinte anos e que lles levaron a ser recoñecidos en 2022 pola Xunta co Premio Galicia de Innovación e Deseño. Tras este relatorio, a actividade continuou co taller de deseño de embalaxe que impartiron luns e martes e que se viu sucedido este mércores e xoves por outro centrado no deseño editorial. Este corre a cargo de Cibrán Rico e Suso Vázquez, do estudio Desescribir, que previamente presentaron nunha conferencia o traballo que desenvolven nunha empresa que tamén foi recoñecida co premio Galicia de Innovación e Deseño, en 2011, ao que se suman outra serie de galardóns en certames de deseño, como os D&AD Awards de Londres ou PhotoEspaña. Finalmente, esta semana de actividades pecharase este venres cun workshop sobre ilustración para moda, a cargo da egresada de Esdemga Aura Aburto, que dende hai máis dunha década traballa como deseñadora de bolsos e accesorios para Bimba y Lola. 

Ademais de para formalos “en diferentes aspectos do deseño”, o obxectivo destas xornadas, como sinalou o decano comisario, Marcos Dopico, é que tamén sirvan ao alumnado da primeira promoción do Grao en Deseño “para orientarse a nivel profesional”, de cara a súa futura especialización. Así o destacou no acto inaugural desta actividade, celebrado o luns, no que participaron tamén o director de área adxunto á Vicerreitoría, Luis Torres, e o presidente do Consello Social, Ernesto Pedrosa. Previamente, estas Conversas Universidade Empresa abordaran a realidade profesional nos ámbitos da fotografía, a creatividade publicitaria e a fisioterapia, nunha serie de encontros nos que participaron 15 profesionais e que tiñan como obxectivo que o alumnado puidese coñecer de primeira man o mercado laboral dos sectores nos que traballarán no futuro, como explicou Torres neste acto, no que Pedrosa puxo o foco na importancia de iniciativas que “conecten á comunidade universitaria co tecido empresarial”.