72 novos petróglifos prehistóricos catalogados e 30 máis identificados; unha cista megalítica típica de enterramentos da Idade de Bronce descuberta; a redimensión dos restos rupestres máis coñecidos da zona e sobre todo, pór no mapa da arqueoloxía galega o patrimonio que ten a zona do Alto Támega, que abrangue os concellos de Laza, Monterrei, Verín, Oímbra e Castrelo do Val. Con este balance tan positivo nas mans, os arqueólogos do Grupo de Estudos en Arqueoloxía, Antigüidade e Territorio (GEAAT) da Universidade de Vigo veñen de rematar o traballo de campo do proxecto Alto Támega: Accións na Paisaxe Patrimonial. “Foi sorprendente todo o que alí atopamos e iso foi posible grazas á enorme implicación dos veciños e entidades da zona. O maior éxito desta acción é que amosa o eficaz que é planificar os proxectos desde a base, contando coas persoas que realmente coñecen a contorna e que a viven”, destaca Beatriz Comendador, responsable da iniciativa.
09/10/2013