A escasos días para o comezo do Forum FISU, e de seguido do Mundial Universitario de Taekwondo, a cidade de Vigo e a Universidade ultiman preparativos para converterse no centro mundial do deporte universitario durante 15 días. Este é o resultado do traballo de moitos meses desenvolto dende o Concello de Vigo e a Universidade para situar “este proxecto de cidade na esfera internacional”, segundo explica a vicerreitora de Extensión Cultural e Estudantes, Mª del Carmen Cabeza, na recta final do seu mandato. E é que estes dous eventos traerán a Vigo un total de 266 representantes de 72 países no caso do Forum FISU e arredor de 400 de 43 nacionalidades no Mundial Universitario de Taekwondo. Así, haberá en Vigo representantes dos cinco continentes e de todas as culturas e bloques, dende o mundo árabe, ata África pasando por América do Norte e do Sur, os países da lusofonía, Asia ou a Commonwealth.
17/06/2010