Co auxe dos produtos ecolóxicos, entre os consumidores medra tamén a demanda de información sobre a orixe, elaboración e distribución dos alimentos que mercan. Un proxecto financiado pola Unión Europea, no que participan dez organismos de seis países, está a traballar no deseño dun sistema que, mediante identificación por radiofrecuencia, permita crear unha base de datos europea. A través desta base produtores, fabricantes, distribuidores e consumidores poderían coñecer toda a información dos produtos, dende a orixe ata a temperatura na que se conservan, sistemas de almacenamento, aditivos, etc.
Neste proxecto comunitario RDFI From Farm to Fork traballa un grupo de investigadores do Departamento de Teoría do Sinal e Comunicacións dirixido polo profesor Íñigo Cuiñas con probas piloto en marcha en colaboración con adegas.
30/11/2010