Javier Guerra gaba un centro no que “se une o mellor do mundo universitario e do empresarial”
Gradiant acada unha facturación que supera os 3 millóns de euros
“Exemplo da unión entre o mellor do mundo universitario e da empresa”, así se referiu ao centro, Javier Guerra, conselleiro de Economía e Industria na presentación de resultados do centro, onde estivo acompañado polo director xeral de Gradiant, o profesor Fernando Pérez, e o director xeral de I+D+i, Ricardo Capilla, ademais de numerosos membros da Universidade, encabezados pola directora da escola, Edita de Lorenzo.
Os contratos con empresas supoñen o 52% dos ingresos
Creado có obxectivo de xerar e transferir coñecemento á industria, hoxe Gradiant converteuse “no departamento de I+D de moitísimas pequenas e medianas empresas”, subliñou Fernando Pérez, que destacou o feito de que o 52% dos ingresos acadados no 2010, proveñen directamente de contratos con empresas “e as previsións para o ano 2011 indican que esta cifra vai seguir mellorando”, contando nestes intres cunha previsión de ingresos para o vindeiro ano de algo máis de 1.800.000 euros por servizos de I+D a empresas.Xunto a esta forte relación co sector empresarial, os resultados de 2010 reflicten tamén o firme compromiso do centro coa captación de recursos externos a Galicia, un aspecto que dende a consellería, valoraron moi positivamente, por “pioneiros” e porque “demostra que non sempre é necesario ir da man do sector público para medrar e alcanzar novos coñecementos”, subliñou o conselleiro, quen destacou que “ reduciu a súa dependencia de financiamento directo da Xunta a menos dun 30%” e se trata do centro galego con maior actividade en proxectos do fondo tecnolóxico.
50 empregos de “alta cualificación”
Nun intre no que a maior parte das novas económicas son negativas, a valoración de resultados deste centro tecnolóxico, puxo tamén de relevo que dende Galicia se poden crear postos de traballo de alta cualificación, tal e como reflicte a evolución de Gradiant que “creou xa máis de 50 empregos”, subliñou o conselleiro, presidente do padroado da Fundación, que inclúe capital privado, a Xunta e as tres universidades galegas.Con ampla maioría de persoal dedicado a investigación, o director de Gradiant mencionou varios exemplos dos traballos que están a levar a cabo, dende publicidade interactiva e personalizada ata solucións TIC para sectores como o enerxético ou do moble ou mesmo sensores bluetooh contra os atascos.