O equipo de xadrez, campión de liga despois de 15 anos de dominio do Marcote

Unha fin de semana máis, os equipos de xadrez da Universidade de Vigo acadaron cadansúa vitoria na liga regular rivalizando entre eles no que a bos resultados se refire. O equipo da División de Honra impúxose ao Arteixo A na derradeira xornada da competición regular, proclamándose así campión destes categoría, cun punto de vantaxe sobre o segundo, o Marcote A, equipo que foi o claro dominador do xadrez galego nos últimos dez anos.
Co pase á Final a Catro xa asegurado, os universitarios precisaban acadar un mínimo de 4.5 puntos para manterse no primeiro posto e rematar a fase regular sendo líderes. Así os xogadores capitaneados por Pablo García realizaron un dos mellores encontros da tempada vencendo ao Arteixo A por 1 a 5. As vitorias viñeron da man de Ramón Garza, do propio Pablo García e de Roberto Páramos que destacaron por realizar partidas rápidas e con clara superioridade. Pola súa banda, Rafael Rodríguez e Miguel Senlle sumaron dous empates, pero foi Manuel Pena, que se enfrontou á partida máis longa e complexa da xornada, o que lle deu o punto definitivo e a vitoria final ao equipo da Universidade.

Final a Catro

Coa liga xa rematada, a vindeira cita para o equipo universitario será o 26 de abril ás 17 horas no primeiro enfrontamento da Final a Catro no que se medirán ao Padrón A, cuarto clasificado ao que xa venceron na fase regular por 4.5 a 1.5. Con todo, o partido non semella nada sinxelo, xa que os seus rivais poderán contar con tres mestres internacionais do Uruguai, que non tomaron parte nos encontros da liga. A outra semifinal enfrontará ao Marcote A co Círculo Ferrolán de Xadrez.
Os vigueses xogarán como locais tanto a semifinal como a final, no caso de clasificarse, de xeito que as partidas terán lugar na Aula de Xadrez do Servizo de Deportes con acceso libre e de balde para o público. Ademais, hai que salientar que ao rematar líderes da fase regular, os universitarios parten coa vantaxe de que en caso de empate 3 a 3 favorece ao equipo con mellor clasificación na xeral.

O equipo escolar ascendeu á Primeira División

Pero a fin de semana trouxo tamén a boa nova do ascenso do Universidade de Vigo-Xadrez Galego á Primeira División Galega. Os escolares, que seguen loitando por rematar a liga como líderes da clasificación, xa obtiveron matematicamente o ascenso ao imporse ao Padrón B.
As vitorias foron para Xosé Luís Cebrián, Daniel Vila e Samuel Villar e Rubén Alonso obtivo un empate. Trátese dun contundente resultado contra un equipo nada frouxo, xa que é terceiro clasificado na fase regular. Deste xeito, o segundo equipo do club da Universidade de Vigo fai maior a súa diferenza particular co segundo clasificado, o Breogán A, co que loita directamente polo título de Campión da Segunda División.
A vindeira xornada o equipo escolar medirase ao EXP B pontevedrés, un dos implicados na loita por eludir o descenso, co obxectivo fixado de non fallar e manter o liderato.