Avaliación da satisfacción do estudantado cos programas de doutoramento 2023

Ata o martes 31 de outubro de 2023 estará aberto o prazo para que o estudantado de doutoramento avalíe a súa satisfacción cos programas de doutoramento da Universidade de Vigo.

Tal e como aprobou a Comisión de Calidade da Eido, neste curso avaliarase o curso 2022/2023 a través de dous cuestionarios diferentes: un deles destinado ao estudantado matriculado no primeiro ano de doutoramento e o outro para aquel matriculado no terceiro ano no dito curso.

Os cuestionarios poden responderse en liña mediante unha aplicación informática de enquisas accesible a través dunha ligazón personalizada para cada estudante de doutoramento.

O tratamento dos datos é anónimo e confidencial e o acceso personalizado en ningún caso quedará asociado ás respostas emitidas ao encher o cuestionario nin ao tratamento dos seus resultados.

Este proceso de recollida da opinión resulta imprescindible para a mellora continua dos programas de doutoramento da Universidade de Vigo, polo que agradecemos a colaboración do estudantado dun xeito sincero e responsable.