Salustiano Mato de la Iglesia

(2010-2018)

Salustiano Mato toma posesion reitor universidade vigoCatedrático de Universidade de Zooloxía, Salustiano Mato de la Iglesia (Santiago, 1960) é doutor en Bioloxía pola Universidade de Santiago de Compostela e, tras realizar un posdoutoramento nas universidades de Cornell e Rutgers de Estados Unidos, no eido da compostaxe, foi profesor da Escola Técnica de Enxeñeiros Agrónomos de Lugo así como na da Facultade de Ciencias de Ourense. Dende o ano 2000 exerce como catedrático de Zooloxía no Departamento de Ecoloxía e Bioloxía Animal da Universidade de Vigo, con docencia na Facultade de Bioloxía. Publicou máis de 100 traballos científicos no seu ámbito de especialización, a ecoloxía do solo e o tratamento de residuos e conta con dúas patentes.

O seu interese e a súa experiencia profesional céntranse no mundo universitario, no que ten desenvolvido diversas responsabilidades na Universidade de Vigo: vicedecano da Facultade de Ciencias de Ourense, director do departamento de Ecoloxía e Bioloxía Animal, decano da Facultade de Ciencias de Vigo e, posteriormente, vicerreitor de Investigación entre os anos 1998 e 2005. 

Tras unha paréntese no período 2005-2009 no que exerceu o cargo de director xeral de Investigación, Desenvolvemento e Innovación na Xunta de Galicia, reincorpouse á Universidade de Vigo da que foi reitor entre os anos 2010 e 2018. Formou parte do comité executivo da comisión sectorial de I+D+i da Conferencia de Rectores de las Universidades Españolas (CRUE) e ostentou o cargo de presidente da comisión sectorial de secretarías xerais da CRUE. Exerceu tamén a presidencia da Conferencia de Reitores de Universidades do Suroeste Europeo (Crusoe) e a do Centro de Estudos Eurorrexionais Galicia-Portugal (Ceer).