O reitor

Profesor da Universidade de Vigo desde a súa creación en 1990, é licenciado en Bioloxía e en Filosofía pola Universidade de Santiago de Compostela, onde obtivo tamén o título de doutor en Bioloxía. Catedrático de Universidade de Fisioloxía Vexetal, participou con asiduidade en órganos de goberno. Cómpre destacar o seu traballo nas tres comisións de estatutos, incluíndo a constituínte. 

Como responsabilidades de goberno, foi secretario do Colexio Universitario de Vigo, director da Oficina de I+D, adxunto ao vicerreitor de Investigación, dúas veces  decano da Facultade de Ciencias de Vigo (hoxe escindida en tres facultades), director do Departamento de Bioloxía Vexetal e Ciencia do Solo e vicerreitor de Investigación. 

Manuel Reigosa tamén coordinou un mestrado (Ecosistemas Terrestres) e presidiu a comisión académica dun programa de doutoramento, que no seu día acadou a mención cara á excelencia. 

É autor de máis de 100 artigos de investigación e editor de cinco libros para editoriais como Kluwer ou Springer, entre outras. Con seis sexenios investigadores e seis quinquenios docentes recoñecidos, na actualidade está volcado no traballo editorial, incluíndo o traballo como editor xefe de dúas revistas JCR (Thalassas e Allelopathy Journal) e a participación como editor asociado noutras tres (PLOS ONE, Acta Physiologia Plantarum e Weed Biology and Management).

O delegado de Protección de Datos é unha figura independente con funcións de información, asesoramento e supervisión das actividades de tratamento das que é responsable a Universidade de Vigo. Así mesmo, ten a función de cooperar coa Axencia Española de Protección de Datos e de actuar como punto de contacto da autoridade de control para cuestións relativas aos ditos tratamentos. Tanto a súa posición como as súas funcións están reguladas nos artigos 37 a 39 do Regulamento (UE) 2016/679 do Parlamento Europeo e do Consello, do 27 de abril de 2016, relativo á protección das persoas físicas no que respecta ao tratamento de datos persoais e á libre circulación destes datos e polo que se derroga a Directiva 95/46/CE (Regulamento xeral de protección de datos) e nos artigos 34 a 37 da Lei orgánica 3/2018, do 5 de decembro, de protección de datos persoais e garantía dos dereitos dixitais.

O delegado do reitor na Comisión Interuniversitaria de Galicia (CiUG) desenvolve as atribucións ás que fai referencia o artigo 16 do Real decreto 1892/2008, do 14 de novembro, como responsable da comisión organizadora das probas de acceso á universidade. Ademais, en Galicia, son competencia da CiUG os procesos de acceso e de admisión ás tres universidades públicas galegas, en virtude da orde do 24 de marzo de 2011. O traballo está organizado atendendo aos principios de distrito único, autonomía universitaria, coordinación do proceso e xestión integral baixo a idea xeral de modelo conxunto con procedementos idénticos e únicos para todo o distrito.

• Atender a diversidade sexual e de xénero (colectivo LGTBIQA+), así como outros colectivos infrarrepresentados, de tipo étnico-cultural e outros.
• Coordinar as situacións de discapacidade e NEAE integradas no Servizo de Extensión Universitaria (atención ao estudantado).

• Asesorar o equipo de goberno en cuestións relacionadas cos sistemas de información, tecnoloxías da información e as comunicacións, seguridade da información e de transformación dixital da Universidade.
• Tras a súa aprobación, realizar o seguimento e a execución dos diferentes proxectos no ámbito das TIC e da transformación dixital.
• Desenvolver o cargo de responsable de seguridade da información clasificada de grao de difusión limitada ou equivalente da Universidade de Vigo.

• Analizar datos e ofrecer asesoramento orientado á planificación financeira e orzamentaria.
• Analizar e asesorar en materia de viabilidade de investimentos no marco económico-financeiro e orzamentario da Universidade de Vigo.
• Ofrecer asesoramento económico, financeiro e orzamentario verbo das medidas de política universitaria.
• Analizar e orientar en materia de recursos.
• Examinar a contabilidade analítica, avaliar criterios e determinar custos.

• Coordinar os títulos do proxecto Universidade sen Fronteiras.
• Representar a Universidade de Vigo nas tarefas relativas ao proxecto Universidade sen Fronteiras 2.0.
• Representar a Universidade de Vigo nas iniciativas de graos europeos, tanto dentro da Universidade Europea ATHENA, da que a UVigo forma parte, como no eido transfronteirizo, en coordinación coas vicerreitorías de Internacionalización e de Titulacións e Ordenación Académica.

A Unidade de Igualdade de Oportunidades é o instrumento político responsable da incorporación transversal do principio de igualdade efectiva entre mulleres e homes, en todas as áreas da comunidade universitaria. En liña co obxectivo de desenvolvemento sostible 5 da Axenda 2030, busca a igualdade real e efectiva entre mulleres e homes na nosa institución académica. 

As súas funcións son: 

• Promover medidas que garantan a igualdade de acceso á investigación e aos estudos universitarios, ao traballo e á promoción profesional das mulleres e dos homes da Universidade de Vigo.
• Seguir o desenvolvemento e o cumprimento da lexislación e dos plans e medidas que se adopten na materia.
• Deseñar, en colaboración co equipo de goberno, as políticas de igualdade de xénero da institución. 
• Implantar, seguir e avaliar os plans de igualdade. 
• Asesorar os centros, órganos e servizos para integrar a perspectiva de xénero en toda a actividade universitaria. 
• Fomentar o coñecemento na comunidade universitaria do alcance e do significado do principio de igualdade de xénero. 
• Realizar accións de formación e de sensibilización para lograr unha contorna igualitaria e libre de violencias.