O Campus do Mar

Referencia internacional para o coñecemento dos océanos

O Campus de Excelencia Internacional - Campus do Mar (CDM), liderado pola Universidade de Vigo e promovido tamén polas universidades de Santiago de Compostela e A Coruña, o Consello Superior de Investigacións Científicas e o Instituto Español de Oceanografía, é un campus transfronteirizo que conta, ademais, coas universidades portuguesas de Aveiro, Minho, Porto, Coimbra e Tras os Montes e Alto Douro, os institutos politécnicos de Leiría, Porto e Viana do Castelo e que, xunto ás plataformas e centros tecnolóxicos, agrega os axentes investigadores e socioeconómicos da Eurorrexión Galicia-Norte de Portugal relacionados co ámbito mariño.

A agrupación de I+D+i do Campus do Mar agrega máis de 3.000 investigadores e investigadoras pertencentes a 25 institucións, 1.400 doutores e doutoras, que suman máis de 10.500 traballos de investigación publicados, máis de 600 teses de doutoramento e máis de 6.000 proxectos de investigación ao longo dos últimos cinco anos.

Traballos no mar

 

Unha decisión estratéxica

Apostar polo mar como elemento vertebrador do Campus de Excelencia Internacional da eurorrexión non é casual, senón unha necesidade demandada pola extensa rede de I+D+i mariña existente no noroeste da península ibérica. Universidades, organismos públicos de investigación, centros e plataformas tecnolóxicas cun gran potencial que se sitúan nun territorio coas condicións de partida idóneas para converterse nun polo de xeración de coñecemento de excelencia e atracción de talento a nivel mundial.

Por iso, o Campus do Mar busca converterse en dinamizador dunha rede transfronteiriza e integrada de unidades de investigación, docencia e transferencia de coñecemento, que forme aos mellores profesionais e investigadores no ámbito das ciencias e das tecnoloxías do mar, que xere investigación de calidade e impacto internacional e que proporcione á industria as ferramentas para mellorar a súa competitividade a escala global.

Como servizos destacados, ofrece un Programa de doutoramento en ciencia, tecnoloxía e xestión do mar "DO*MAR", un portal de emprego, chamado "MAR*JOB", unha plataforma de cursos MOOC e o Campus Dixital do Mar "DIGIMAR".


Visita a web do Campus do Mar