Benvidos ao sur, remake da comedia francesa Benvidos ao norte e dirixida por Luca Miniero en 2010, está protagonizada por Alberto, un traballador dunha oficina de correos que é sancionado cun traslado a unha pequena vila da Campania, considerada polos italianos do norte a terra da camorra e os lacazáns. Non obstante, o protagonista da película descobre un lugar fascinante, xente hospitalaria e un gran amigo.

A entrada é de balde e unha vez rematada a proxección comezará un coloquio moderado pola docente de italiano do Centro de Linguas da Universidade de Vigo Francesca Carlucci xunto coa psicóloga experta en comunicación, Daniela Sarraino.

O ciclo Cine e Lingua, organizado pola Vicerreitoría de Captación de Alumnado, Estudantes e Extensión Universitaria da Universidade de Vigo, acada este ano a súa 10ª edición.