A gran beleza, gañadora do Oscar á mellor película de fala non inglesa en 2013,  amosa a trama de relacións que durante un verán manteñen en Roma nobres decadentes, políticos, criminais, xornalistas, artistas e prelados.  No centro da trama, Paolo Sorrentino sitúa a Jep Gambardella, un escritor de 65 anos, autor dun único libro e xornalista, que desde a indolencia asiste a este desfile de personaxes.

A entrada é de balde e unha vez rematada a proxección comezará un coloquio moderado pola docente de italiano do Centro de Linguas da Universidade de Vigo Francesca Carlucci xunto coa psicóloga experta en comunicación, Daniela Sarraino.

O ciclo Cine e Lingua, organizado pola Vicerreitoría de Captación de Alumnado, Estudantes e Extensión Universitaria da Universidade de Vigo, acada este ano a súa 10ª edición.