A Escola de Enxeñaría de Minas e Enerxía organiza por terceiro ano consecutivo un ciclo de cine, aberto ao conxunto da cidadanía, que centra a ollada na presenza de mulleres científicas e tecnólogas na cinematografía. A actividade, patrocinada pola Unidade de Igualdade e dirixida polo experto docente en cine Alfonso Castaño, titúlase (In)visibilidade das mulleres STEAM e inclúe, nesta edición, a proxección de dous filmes e dous documentais.

Nesta terceira sesión proxéctase o documental Rafea: solar mama (Mona Eldaief, Jehane Noujaim, 2012), no que se conta a historia dunha muller beduína, Rafea, e as súas compañeiras, que teñen a oportunidade de ser formadas nun programa do Barefoot College (India) nas ferramentas da enxeñaría que lles permitan levar a luz ás súas aldeas.