A Escola de Enxeñaría de Minas e Enerxía organiza por terceiro ano consecutivo un ciclo de cine, aberto ao conxunto da cidadanía, que centra a ollada na presenza de mulleres científicas e tecnólogas na cinematografía. A actividade, patrocinada pola Unidade de Igualdade e dirixida polo experto docente en cine Alfonso Castaño, titúlase (In)visibilidade das mulleres STEAM e inclúe a proxección de dous filmes e dous documentais.

Nesta última sesión proxéctase o documental Picture a scientist (Ian Cheney, Sharon Shattuck, 2020), no que se narran as dificultades que encontran as mulleres científicas ao longo da súa carreira. “O eixo central xira arredor da bióloga Nancy Hopkins, a química Raychelle Burks e a xeóloga Jane Willenbring que falan das súas experiencias”.