As rutas culturais da Universidade de Vigo celebran este curso académico 20 anos de existencia. No marco desta conmemoración, a Área de Benestar, Saúde e Deporte organiza unha andaina que reproduce a primeira ruta realizada en febreiro de 1999. As e os inscritos realizarán un percorrido de aproximadamente 16 quilómetros pola contorna de Ourense que sairá do campus e percorrerá Montealegre, Ceboliño, Cachamuíña e o Castro de Santo Tomé. Ao final da ruta haberá petiscos de confraternización e sorteo de agasallos, a partir das 15.00 h, na cafetaría do edificio Xurídico-Empresarial do campus.