Día Internacional da Propiedade Intelectual

A Universidade de Vigo convida a comunidade universitaria a celebrar o Día Mundial da Propiedade Intelectual seguindo a mesa redonda virtual organizada pola Universidade Europea ATHENA xunto coa Enterprise Europe Network co obxectivo de destacar a importancia da propriedade intelectual no ecosistema da innovación.

Baixo o título "Intellectual property in the innovation ecosystem - why is it important?",  a cita será o vindeiro 21 de abril, ás 10.00 h.

Máis información

A UVigo é unha das nove institucións universitarias que integran a alianza ATHENA (Advanced Technology Higher Education Network Alliance), un dos proxectos piloto de universidades europeas seleccionados pola Comisión Europea en 2020.

ATHENA céntrase na transformación dixital das sociedades e busca crear formacións internacionalizadas, abrir a mobilidade internacional ao maior número posible de estudantes, favorecer a execución de proxectos de investigación e de desenvolvemento colaborativos e abrir novas perspectivas europeas, non só aos máis de 160.000 estudantes e aos 15.000 traballadores e traballadoras da alianza, senón tamén ás comunidades locais e ás entidades socias.

Ademais da Universidade de Vigo, o consorcio, coordinado polo Instituto Politécnico do Porto (Portugal), está integrado polas seguintes institucións académicas: Université d'Orléans (Francia), Universität Siegen (Alemaña), Univerza v Mariboru (Eslovenia), Vilnius Tech (Lituania), Università Niccolò Cusano (Italia), Ελληνικό Μεσογειακό Πανεπιστήμιο-Universidade Helénica do Mediterráneo (Grecia) e Uniwersytet Marii Curie-Skłodowskiej w Lublinie (Polonia). 

Na web do consorcio poderás coñecer as oportunidades que ATHENA lles ofrece a todas as persoas que forman a comunidade universitaria.

Web de ATHENA