Máster Universitario en Estudos Ingleses Avanzados e as súas Aplicacións
Características
A titulación integra o estudo da lingua, a literatura e a cultura dos países de fala inglesa nas tres universidades galegas (UDC, USC e UVigo) e ofrece formación avanzada en temas clave dentro deste campo. Trátase dun programa de 60 ECTS cun formato de aprendizaxe semipresencial, que combina a docencia presencial (14 horas por materia) con traballo virtual e independente. O primeiro semestre consta de oito materias obrigatorias e o segundo semestre de seis materias adicionais. O alumnado pode elixir entre dúas vías: unha especializada en Lingüística e outra en Literatura e cultura. O programa complétase cunhas prácticas en diversas empresas e institucións (6 ECTS) e un proxecto de investigación (12 ECTS).
Acceso e admisión
Requisito obrigatorio
- Posuír o nivel C1 tanto oral como escrito.
Criterios de admisión
Será admitido no mestrado calquera estudante que completara con éxito unha licenciatura ou diplomatura no campo das artes e humanidades, xa sexa un título español ou expedido por unha institución de educación superior do espazo europeo de educación superior.
O perfil de acceso das persoas solicitantes, por orde de prioridade, será o seguinte:
1. Licenciatura en Filoloxía Inglesa, Linguas Estranxeiras, Estudos Ingleses ou titulacións similares.
2. Graos e mestrados noutras filoloxías e linguas e en lingüística.
3. Grao e mestrado en Tradución e Interpretación, en Humanidades e en Socioloxía (que acreditan coñecementos avanzados de inglés escrito e falado).
4. Título de bacharelato e outras titulacións (que acrediten coñecementos avanzados de inglés escrito e falado).
Acceso preferente
Terán acceso preferente ao mestrado aquelas persoas que acrediten estar en posesión dunha:
- Licenciatura ou mestrado en Filoloxía Inglesa, Linguas Estranxeiras, Estudos Ingleses, Lingua, Literatura e Cultura Inglesas, Lingua Irlandesa, Lingüística Inglesa ou similares.
Outras vías de acceso
Así mesmo, poderán acceder as persoas solicitantes que posúan un:
- Diploma de estudos avanzados (DEA) ou suficiencia investigadora nas áreas de Filoloxía Inglesa, Filoloxía, Tradución e Interpretación e Humanidades.
- Diploma de estudos avanzados (DEA) ou suficiencia investigadora en Comunicación, Ciencias Sociais e Socioloxía, Ciencias Políticas e da Administración, Educación Infantil, Educación Primaria, Educación Social e Pedagoxía, Historia e Filosofía, sempre que demostren coñecementos avanzados na lingua inglesa.
Requisitos de admisión e/ou criterios de avaliación específicos
- Expediente académico (70 %).
- Currículo, con especial atención á experiencia relacionada co programa (15 %).
- Carta de interese redactada en inglés (15 %) ou, se a comisión o considera necesario (ver os casos en «requisitos»), entrevista en liña.
Plan de estudos
O iMAES é un requisito previo para a admisión a calquera programa de doutoramento en estudos ingleses, incluído o IDAES, un programa de doutoramento interuniversitario organizado conxuntamente polas universidades de Santiago de Compostela, A Coruña e Vigo. Máis concretamente, o mestrado proporciona a orientación necesaria para a investigación e a docencia no ámbito universitario nos diversos campos de especialización do seu profesorado, a saber: variación e cambio lingüístico (principalmente desde a perspectiva da gramática cognitiva e a gramática da construción); lingüística de corpus; sociolingüística; psicolingüística e procesamento da linguaxe; pragmática e análise do discurso; estudos contrastivos; inglés para fins específicos; ensino e adquisición de linguas; literaturas e culturas anglófonas; estudos sobre literatura e identidade; estudos de xénero; ecocrítica; estudos literarios e cinematográficos; e tradución literaria.
Saídas Profesionáis
O mestrado é un excelente complemento aos estudos para o acceso á docencia no ensino secundario, así como para outros perfís profesionais diversos nos ámbitos da tradución, a mediación e a xestión cultural, o turismo, a edición, a crítica literaria e cinematográfica, o xornalismo e a publicidade.