Máster Universitario en Dirección de Arte en Publicidade
Características
O Mestrado en dirección de arte publicitaria proporciona unha perspectiva profesional sobre deseño gráfico e creatividade dentro do proceso publicitario.
Trátase dun posgrao cun plan de estudos eminentemente práctico e dirixido a proporcionarlle ao estudantado a mellor formación para integrarse en departamentos de arte e ser parte activa do proceso creativo.
As prácticas en empresas obrigatorias e a posibilidade de realizar parte dos estudos no estranxeiro facilitarán que o estudantado adquira unha perspectiva global e profesional do mercado no que vai desenvolver a súa actividade.
Acceso e admisión
Para os criterios de valoración de méritos do potencial alumnado establécese un baremo sobre 100 puntos de acordo cos seguintes requisitos:
- Tituladas/os en Publicidade e Relacións Públicas, Comunicación Audiovisual, Belas Artes e Deseño Gráfico: 30 puntos
- Tituladas/os en Xornalismo, Historia da Arte e titulacións de ciencias sociais: 10 puntos
- Resto de titulacións: 0 puntos
- Expediente académico: ata 40 puntos.
- Currículo profesional: ata 20 puntos.
- Portafolio cos traballos máis representativos na traxectoria das persoas aspirantes: ata 20 puntos.
O número mínimo de estudantes será 20 e o máximo 35 e non se admitirá matrícula parcial neste mestrado.
Plan de estudos
- Dominar os coñecementos e as ferramentas necesarias para o desempeño competente, autónomo ou colaborativo de actividades profesionais relacionadas coa creatividade publicitaria.
- Ser capaz de construír e planificar discursos propios da comunicación publicitaria para desenvolver campañas, adaptando as estratexias e as mensaxes aos obxectivos establecidos e aos diferentes públicos.
- Fomentar a capacidade analítica, crítica e reflexiva en relación coa creatividade publicitaria, con coñecementos teóricos, técnicos e estéticos sobre as orixes, o panorama actual e as novas tendencias da dirección artística en publicidade.
- Coñecer a historia e as diferentes teorías do deseño e a creatividade publicitaria.
- Ser capaz de identificar novas tendencias relacionadas coa publicidade e a comunicación mediante o uso de ferramentas e bases de datos específicas.
- Coñecer as técnicas e os procesos creativos da publicidade, tanto na teoría como na práctica, identificando os recursos, elementos e métodos empregados.
- Posuír a capacidade teórica e práctica para a creación, elaboración e desenvolvemento dun orixinal publicitario no marco dunha estratexia corporativa global, adaptándoo ás necesidades creativas e de produción de cada unha das canles de difusión.
- Ter coñecementos básicos para situar a actividade publicitaria nun contexto de competencia local, nacional e internacional, destacando a importancia das técnicas creativas como activo diferenciador na publicidade.
- Ser capaz de crear e desenvolver ideas de proxectos publicitarios que se adapten a posibles cambios ou novos contornos de mercado.
- Ser capaz de concibir e deseñar mensaxes creativas eficaces dentro dunha estratexia publicitaria, orientada a diferentes medios e soportes, segundo os públicos establecidos.
- Ser capaz de producir mensaxes creativas eficaces dentro dunha estratexia publicitaria.
- Ser capaz de redactar textos publicitarios con fluidez e axeitadamente ás necesidades creativas da mensaxe, aplicando as características da linguaxe publicitaria.
- Practicar a autoavaliación crítica dos resultados, valorando a importancia de corrixir os erros cometidos no proceso creativo.
- Ter a capacidade de organizar e programar tarefas, cumprindo os prazos para as entregas orixinais segundo unha estratexia publicitaria específica.
- Ser capaz de crear e desenvolver marcas persoais, adaptándoas a diferentes medios e formatos.
- Coñecer as técnicas para o desenvolvemento de proxectos multimedia interactivos.