Cine

Ciclo anual centrado nunha temática en concreto. Os venres dos tres últimos meses (aproximadamente) do ano, na Casa das Campás, proxéctase unha escolma de filmes de diferentes épocas que se insiren na temática do ciclo.

Organizado pola Asociación Cultural Novos Cinemas e Matriuska Producións, coa participación do Concello de Pontevedra e a Universidade de Vigo, o apoio da Deputación e a Axencia Galega das Industrias Culturais (Agadic), e a dirección artística de Suso Novás, o Festival Novos Cinemas céntrase nas primeiras e segundas películas de novos e novas cineastas. As proxeccións compleméntanse por un programa formativo, no que se insire o obradoiro (o LAB de Novos Cinemas) no que estudantes do campus realizan unha serie de curtametraxes que se estrean na primeira xornada do festival, xunto cunha serie de encontros con profesionais do sector.

A súa programación está conformada pola sección oficial; pola sección LATEXOS, que promove a interacción entre imaxes e sons que aspiran a nutrirnos evitando calquera ortodoxia ou dogma, e pola sección Foco, monográfico adicado á obra dun cineasta en particular.

O cinema italiano será o protagonista da décimo cuarta edición do Ciclo de Cine Lingua, unha proposta da Vicerreitoría de Extensión Universitaria que ten como finalidade achegar a cidadanía ás películas na súa versión orixinal con subtítulos en español. 

• Programa

Goza dos mellores documentais durante todo o ano (agás en xullo e en agosto), de xeito presencial en Pontevedra, na Casa das Campas e en Vigo, no auditorio municipal, e tamén en liña para toda a comunidade universitaria solicitando o código de acceso a docs-ou@uvigo.gal. 

Ao longo dos meses de abril e de maio desenvolverase a primeira parte do Ciclo de cinema: a lingua galega no cinema. As proxeccións terán lugar no auditorio do Parque Nacional das Illas Atlánticas de Galicia (Edificio Cambón), na rúa da Oliva, 3, en Vigo. A entrada é de balde ata completar a capacidade.

• Programa

A Universidade de Vigo coordina e organiza a Semana de Cine Submarino de Vigo, que na actualidade é un acontecemento cultural de primeiro nivel na cidade e referencia obrigada para os amantes do mar e do cine

A primeira edición da Semana de cine submarino de Vigo remóntase a 1985. Neste longo percorrido, dende os océanos máis profundos, a biodiversidade das rías galegas ou as augas continentais, foron moitas as temáticas tratadas nos documentais proxectados. Todas elas relacionadas co mundo submarino e coa biodiversidade acuática.

Dende a universidade apostamos polo estudo e pola preservación deste tesouro que ano tras ano sae á luz grazas a este evento. O coñecemento dese contorno e a experiencia da súa beleza han de afoutar a nosa relación con este medio natural para preservalo e coidalo, transmitíndollelo así ás novas xeracións que cos seus colexios asistirán ás actividades que temos programadas para eles.