Espazos expositivos en Vigo

Edificio Redeiras

Redeiras, o novo edificio institucional da Universidade de Vigo, situado na praza do Berbés de Vigo, conta entre outros, cun espazo expositivo multifuncional onde amosarlle á sociedade actividades artísticas de distinto xénero como parte do compromiso da nosa institución co fomento e coa difusión da cultura en todas as súas formas.

Exposición "AstrónomAs"

A exposición "AstrónomAs" poderase visitar no edificio Redeiras, no marco do I Congreso Galego de Astronomía e Astrofísica. 

• Do 15 ao 30 de xullo, de 9.00 a 14.00 horas (de luns a venres. Entrada pública e de balde.

A exposición "AstrónomAs" céntrase nas mulleres que dedicaron os seus días e as súas noites ao estudo da astronomía. A súa versión dixital, dispoñible na páxina web www.astronomas.org, inclúe máis de 300 astrónomas que traballan ou traballaron nunha ou máis das 14 disciplinas nas que se estrutura a exposición. Reflicte unha ampla variedade de etnias, áreas xeográficas, categorías profesionais e diversidade funcional. Ademais de información sobre cada unha das protagonistas, compleméntase con diversos materiais como: unha contextualización da astronomía con outras ciencias e a súa relación coa cultura (cine, literatura, arte etc.), folletos educativos descargables, xogos interactivos, podcasts e vídeos. Todo isto acompañado dunha banda sonora orixinal composta por unha moza astrofísica e talento musical. Tamén inclúe unha versión física de 16 paneis impresos, dispoñibles en diferentes idiomas. Entre os obxectivos da exposición "AstrónomAs" están: promover as vocacións científicas e tecnolóxicas en xeral e entre as nenas e adolescentes en particular, difundir a investigación realizada por mulleres científicas en astronomía e astrofísica, as innovacións relacionadas e as perspectivas de futuro nestes campos.